अमेरिकाको मध्यावधि निर्वाचनमा राष्ट्रपति डोनाल्ड ट्रम्पको रिपब्लिकन पार्टीले संसद्का दुवै सदनको नियन्त्रण गुमाएपछि रक्षामन्त्री पिट हेगसेथमाथि महाभियोग लगाउने तयारी अघि बढेको छ।
इरानविरुद्धको युद्धलाई लिएर आफ्नै पार्टीभित्र समेत आलोचना खेपिरहेका हेगसेथलाई पदबाट हटाउन कंग्रेसमा दबाब बढेको अन्तर्राष्ट्रिय समाचार संस्था रोयटर्सले लेखेको छ।
महाभियोगको पहल भने विपक्षी डेमोक्रेटिक पार्टीका सांसदसँगै रिपब्लिकन सांसदले पनि गरिरहेका छन्।
रिपब्लिकन सांसद थोमस मासीले आगामी साता प्रतिनिधिसभामा हेगसेथविरुद्ध महाभियोग प्रस्ताव पुनः पेस गर्ने बताएका छन्।
यसअघि पनि उनले हेगसेथविरुद्ध महाभियोग प्रस्ताव ल्याएका थिए। तर मध्यावधि निर्वाचनअघि प्रतिनिधिसभाको बैठक समयअगावै अन्त्य भएपछि त्यसमा मतदान हुन सकेको थिएन।
सिएनएनका अनुसार मासीले आगामी सोमबार वा मंगलबार प्रस्ताव अघि बढाउने तयारी गरेका छन्।
उनले प्रस्ताव पारित हुन आवश्यक पर्ने केही रिपब्लिकन सांसदको समर्थन समेत जुट्न सक्ने विश्वास व्यक्त गरेका छन्। सिएनएनसँग कुरा गरेका रिपब्लिकन पार्टीका केही स्रोतले पनि प्रस्ताव प्रतिनिधिसभाबाट पारित हुन सक्ने अनुमान गरेका छन्।
यसअघि सेप्टेम्बरमा मासीले हेगसेथविरुद्ध ८ वटा आरोप समेटिएको महाभियोग प्रस्ताव दर्ता गरेका थिए।
त्यसमा कंग्रेसको स्वीकृतिबिना इरानविरुद्ध युद्ध सञ्चालन गरेको, मानव अधिकार उल्लंघन गरेको र संविधानविपरीत काम गरेको लगायतका आरोप छन्। मासीले हेगसेथले रक्षामन्त्रीको जिम्मेवारी र संवैधानिक दायित्वविपरीत काम गरेको आरोप लगाउँदै आएका छन्।
महाभियोगको तयारीलाई बल पुग्नुमा निर्वाचन परिणाम र इरान युद्धप्रति रिपब्लिकन नेताहरूको असन्तुष्टि मुख्य कारण देखिएको छ।
उपराष्ट्रपति जेडी भान्सले समेत इरान युद्धकै कारण पार्टीले निर्वाचन हारेको सार्वजनिक अभिव्यक्ति दिएका छन्।
रिपब्लिकन पार्टीका सांसदहरूले पनि इरानमाथि आक्रमण गर्ने निर्णयमा हेगसेथको भूमिका रहेको भन्दै उनलाई जिम्मेवार ठहर्याउन थालेका छन्।
सिएनएनका अनुसार केही रिपब्लिकन नेताहरूले ट्रम्पलाई इरानमाथि आक्रमण गर्न हेगसेथले नै उक्साएको र युद्धको अन्त्य कसरी गर्ने भन्ने स्पष्ट योजना नबनाएको आरोप लगाएका छन्।
युद्धको राजनीतिक र आर्थिक परिणामबारे पनि उनले पर्याप्त आकलन नगरेको उनीहरूको भनाइ छ।
निर्वाचनबाट दुवै सदनमा बहुमत हासिल गरेको डेमोक्रेटिक पार्टीले पनि हेगसेथ नेतृत्वको रक्षा मन्त्रालयमाथि व्यापक छानबिन गर्ने तयारी गरेको छ।
आगामी जनवरीदेखि कंग्रेसको नेतृत्व सम्हाल्ने डेमोक्रेटिक सांसदहरूले इरान युद्ध सञ्चालनको तरिका, वरिष्ठ सैन्य अधिकारीहरूको बर्खास्ती र रक्षा मन्त्रालयको व्यवस्थापनबारे छानबिन गर्ने बताएका छन्।
विशेषगरी संयुक्त सैन्य प्रमुखका अध्यक्षलाई हटाइएको विषय छानबिनको दायरामा पर्नेछ। युक्रेनसम्बन्धी अमेरिकी नीति र ल्याटिन अमेरिकी समुद्री क्षेत्रमा लागुऔषध तस्करीको आशंकामा अमेरिकी सेनाले गरेका आक्रमणबारे पनि डेमोक्रेटहरूले प्रश्न उठाउने तयारी गरेका छन्। केही सांसदले ती आक्रमणलाई युद्ध अपराधको संज्ञासमेत दिएका छन्।
रक्षामन्त्री हेगसेथको सांसदहरूसँगको सम्बन्ध पनि तनावपूर्ण छ।
प्रशासनले रक्षा क्षेत्रमा १.५ ट्रिलियन डलर खर्च गर्ने प्रस्ताव अघि बढाइरहेका बेला रिपब्लिकन सिनेटर थोम टिलिसले समेत हेगसेथले सांसदहरूसँग बिगारेको सम्बन्धले बजेट पारित गर्ने प्रयास प्रभावित भइरहेको बताएका छन्।
‘हेगसेथले अब हिसाबकिताब दिनुपर्नेछ,’ उनले सिबीएस न्युजसँग भनेका छन्।
यद्यपि ट्रम्पले भने तत्काल हेगसेथलाई हटाउने संकेत गरेका छैनन्।
बिहीबार पत्रकारहरूसँग कुरा गर्दै उनले हेगसेथले ‘शानदार काम’ गरिरहेको बताएका थिए। उनलाई हटाउनुपर्ने माग गर्नेहरू सेनाका वरिष्ठ अधिकारीहरूलाई बर्खास्त गरिएको विषयबाट असन्तुष्ट रहेको ट्रम्पको भनाइ थियो।
रोयटर्सका अनुसार ट्रम्पले हेगसेथलाई पदमा राख्ने इच्छा व्यक्त गरे पनि प्रशासनभित्र उनको भविष्यबारे छलफल भइरहेको छ।
आफूमाथि महाभियोगको तयारी भइरहेका बेला हेगसेथले भने पदबाट पछि नहट्ने बताएका छन्।
बिहीबार सामाजिक सञ्जालमार्फत सार्वजनिक गरेको भिडियो सन्देशमा उनले महाभियोगको प्रयासलाई ‘राजनीतिक प्रतिशोध’ भन्दै त्यसबाट आफू विचलित नहुने बताए।
‘उनीहरूले ममाथि आक्रमण गरिरहेका छन्, वास्तवमा हामीमाथि नै आक्रमण गरिरहेका छन्, किनकि हामी प्रभावकारी रूपमा काम गरिरहेका छौँ। यो प्रयास सफल हुने छैन। हामी पछि हट्ने छैनौँ,’ उनले भने।
इरान युद्धको बचाउ गर्दै उनले त्यसलाई ‘साहसी र ऐतिहासिक प्रयास’ भनेका छन्। उक्त युद्धले इरानलाई आणविक हतियार बनाउनबाट रोक्ने उनको दाबी छ। उ
नले सांसदहरूलाई युद्धको खर्चसहित सेनाको पुनर्निर्माणका लागि आवश्यक बजेट पारित गर्नसमेत आग्रह गरेका छन्।
